Næturflug á kelluJosa

"úps fyrirgefðu, haltu þá bara áfram að sofa - ég sé þig á morgun" - hringdi í hann bróður minn klukkan 3 í nótt, vakti hann og áttum við einkar athyglisvert samtal, að vísu fremur stutt en athyglisvert engu að síður. Málið var það að hann er að fara til Noregs að hitta kærustuna og var ég - þessi ljúfa systir sem ég er - búin að bjóðast til að skutla honum á flugvöllinn. Ég fór því tilltölulega snemma að sofa í gær - Danni stillti klukkuna rúmlega 2 þar sem við Jói höfðum talað um að leggja af stað upp úr 3 og var ég með skipulagið alveg á hreinu áður en ég lagðist út af í draumaheiminn. Ég drattaðist svo reyndar ekki á fætur fyrr en korter í 3 og fór því næstum í buxurnar öfugar í hamagangnum, rétt mundi eftir bíllyklunum og þurfti svo að snúa við þegar ég var komin út á bílaplan - til að sækja gleraugun mín .. semsagt ekki alveg mitt móment. Ég keyrði svo á aðeins yfir löglegum hraða úr vesturbænum upp í breiðholt, frekar sweet engir bílar á ferli og flest öll ljósin loguðu græn. Þegar ég kom svo að húsinu sá ég hvergi ljós, leit á klukkuna jú jú, hún var rétt rúmlega 3 - ég var á réttum tíma. Hringdi í Jóa sem var lengi að svara og frekar skrítinn í röddinni þegar hann svaraði. Ég var voða róleg til að gera hann ekki stressaðan hvað við vorum að verða sein "hvað segirðu, ertu ekki tilbúinn - varstu sofandi?" - Jói tjáði mér að svo væri og að "flugið væri kl 6 í dag ekki í nótt"!!!